నయాగరా

ట్రావెలాగ్ సీరీస్ లో నేను పరిచయం చేయాలనుకుంటున్న మరో ప్రదేశం 'నయాగరా'. నిజం చెప్పాలంటే ఆ ప్రదేశాన్ని పరిచయం చేయటం కంటే  అక్కడ ఉన్నపుడు నా అనుభవాన్ని గురించి చెప్తున్నాననటం బాగుంటుంది. 

నయాగరా

 నయాగరా వాటర్ ఫాల్స్ ని కెనడా వైపునుంచి, అమెరికా వైపు నుంచి కూడా చూడవచ్చు. రెండు దేశాలను కలుపుతూ ఓ బ్రిడ్జ్ ఈ వాటర్ ఫాల్స్ నుండి సాగే నది పై ఉంది. కానీ నయాగరా ని కెనడా వైపు నుండి చూడడమే బెస్ట్ వ్యూ అని చెప్పారు. ఈ ప్రదేశం చూడడం నాకో ఫాంటసీ అని చెప్పను కానీ చిన్నప్పటి నుంచి చదివిన, విన్న విషయాలు ఓ మూల ఎక్కడో నిక్షిప్తమై ఉండి, ఇలా చూసేఅవకాశం వచ్చినప్పుడు ఎప్పుడెప్పుడా అని నన్ను విపరీతంగా కుతూహలపరచాయి. చూస్తూ ఉన్నపుడు, అక్కడ తిరుగుతూ ఉన్నప్పుడు, తిరిగి వచ్చాక కూడా ఓ కల లానే అనిపించింది. కానీ ఆ జలపాతం శబ్దం మాత్రం ఎప్పుడు గుర్తుకువచ్చినా ఆ రోజు, ఆ జ్ఞాపకాలు కల కాదు అని చెప్తూనే మనసుని మళ్లీ అక్కడకు తీసుకెళ్ళి అనుభవాన్ని మరోసారి తాజా చేస్తాయి.

నయాగరా సిటీ లోకి ప్రవేశించిన కొద్ది సమయానికే ఆ జలపాతం తనకంటూ ప్రత్యేకమైన ఉరిమే శబ్దం తో మనల్ని పలకరిస్తుంది. ఆ చుట్టుపక్కల ఎక్కడ తిరగండి గాక, మిమ్మల్ని నిలవనీయదు, తన వైపు లాక్కుంటున్న అనుభూతి కలిగిస్తుంది. గుర్రపు నాడా ఆకృతిలో కిలోమీటర్ల కొద్దీ  పరుచుకుని జారుతున్న కొన్ని వందల ధారలు చూపు మరల్చుకొనీయవు. నయాగరా ని ఒక్కో చోట నుండి, ఒక్కో టైమ్ లో చూడటం ఓ వైవిధ్యమైన అనుభవాన్ని అందిస్తాయి. రాత్రి పూట ఈ జలపాతం పై లేజర్ షో ఉంటుంది. పక్కనే ఉన్న రోడ్ మీద వెళ్తూ కూడా చూడవచ్చు, కానీ మరింత దగ్గరగా చూడటానికి ఓ ప్లాట్‌ఫామ్ ఏర్పాటుచేసి, టికెట్ కొన్న వాళ్ళకు దగ్గరనుండి చూసే అవకాశం కల్పిస్తారు. ఎక్కడో దూరం నుండి ఫోకస్ చేసిన లేజర్ కిరణాలు ఈ నీటి ధారలను రంగులమయం చేసి, మనకూ జలపాతానికి మధ్య చీకటి అనేదే లేదన్న భావం కలుగ చేస్తాయి. 
   

'మైడ్ ఆఫ్ మిస్ట్' 

నయాగరా ని పగలు, అతి దగ్గరగా చూడటం మాత్రం సాటిలేని అనుభవం. 'మైడ్ ఆఫ్ మిస్ట్' అని లాంచీ లో జలపాతం దగ్గరగా చూపిస్తారు. 'మైడ్ ఆఫ్ మిస్ట్'  అని రాసి ఉన్న ఓ రైన్ కోట్, మరికొన్ని జాగ్రత్తలతో లాంచీ ఎక్కిస్తారు. అప్పటికే ఆ జలపాతం నీటిపై ఉన్నామన్న ఫీలింగ్, దగ్గరగా వెళ్తున్నామన్న ఆలోచన మనసుని ఉరకలు తీయిస్తాయి. దగ్గరగా వెళ్తున్న కొద్దీ కొన్ని వందల రెట్లుగా పెరుగుతున్న శబ్దం, ధాటిగా కొడుతున్న నీటి జల్లు మొదట భయం, తర్వాత అయోమయానికి గురిచేస్తాయి. అతి దగ్గరగా వెళ్ళాక అయితే, కొన్ని వేల ఉరుముల శబ్దం, భరించలేమేమొ అన్నంత వేగంగా జారుతున్న నీళ్ళు, ఇలాంటివి చాలా చూశాం లే అని నీటి ప్రవాహానికి, కాల గమనానికి నిలబడిన రాళ్లు, ఉన్న చోట నిలబడ నీయని జల్లు, ఇవన్నీ తట్టుకోలేని కొన్ని హృదయాలు పెట్టె గావుకేకలు, అన్నీ కలిసి మనసుకి ఓ వింత అయిన అనుభవాన్ని ఇస్తాయి. అలా చూసిన అనుభూతిని శాశ్వతం చేస్తాయి. కళ్ళు మూసుకుని అలా ఉంటే అనంత విశ్వం, పాతాళపు అంచులు గుర్తుకురావటం ఖాయం.  నాకైతే ఎప్పుడో చిన్నప్పుడు చదివిన 'గంగావతరణమ్', గుర్తుకొచ్చింది. లాంచీ దగ్గరగా తీసుకెళ్ళి అలా తిప్పి తీసుకుని వెళ్తారు. దూరమయ్యే కొద్దీ కొంచెం కొంచెం గా ప్రశాంతత ఆవరిస్తున్నట్లనిపిస్తుంది. కానీ కొన్ని రోజుల వరకు ఆ శబ్దం, అనుభవం వెంటాడినట్లు అనిపిస్తాయి.

నయాగరా, మైడ్ ఆఫ్ మిస్ట్ నుండి దగ్గరగా...

నయాగరా లో మరో చూడవలసిన ప్రదేశం అక్కడి మ్యూజియం. చరిత్ర, నావికులు, సాహసగాధలు కలిపిన డాక్యుమెంటరీ చూపిస్తారు. అన్నిటికంటే ఒళ్ళు గగుర్పొడిచే విషయం ఏంటంటే, నయాగరా నుండి జారాలని కొందరు ప్రయత్నం చేశారని, వాళ్ళ ట్రయల్స్, ఆ ప్రయత్నం లో మరణించిన వాళ్ళు, విజయం సాధించిన వారు అన్నీ విషయాలు పొడిపొడిగా ఉన్న ఓ వీడియో చూపిస్తారు.వాళ్ళు వాడిన బాక్స్ ల నమూనాలు అక్కడున్న మ్యూజియం లో చూడవచ్చు. పదే పదే ప్రయత్నం చేసిన వాళ్ళ కథలు, జయాపజయాలు చూసినప్పుడు మాత్రం గొప్పగా అనిపించవచ్చు.

 ఓ సాహసగాధ

 ప్రస్తుతం నయాగరా నుండి జారటం నిషేధం. పది వేల డాలర్ల ఫైన్. కానీ 'చరిత్ర లోచేరటం ముందు ఇది చాలా చిన్న మొత్తం' అని ఓ పెద్దమనిషి రాశాడు అక్కడ. ఇవికాక కాసినోలు, గేమింగ్ జోన్లు చాలా ఉన్నాయక్కడ. ఎన్నున్నా ఆ హోరు, భయం, దృశ్యం కలిపి నయాగరా అందించే థ్రిల్ ముందు ఏదైనా దిగదుడుపే.